Lifur

Halló halló. Segiði ekki allt gott? Nú er það. O.K.

Fór í jólaföndur til Huldu sis. á fimmtudagskvöldið og læri að búa til þrívíddarjólakort. Þannig að þið sem fáið 40 feta gám sendan heim rétt fyrir jólin og vitið ekki hvaðan á ykkur stendur verðið ég meina veðrið, látið ykkur ekki bregða. Þetta er bara jólakort frá mér.

Nú þegar loksins er búið að fletta ofan af svikum olíufélaganna þá held ég best sé að SÓLVEIG PÉTURSDÓTTIR fyrrum dómsmálaráðherra fái að fjúka. Af hverju sagði manneskjan ekki af sér þingmennsku. Skítt með það þó að maðurinn hennar sem óvart var forstjóri Skeljungs hafi ekki sagt henni neitt í óspurðum fréttum þar sem þau borðuðu ýsuna sína. Þetta er bara spurning um prinsipp. Þau pössuðu sig líka á því að vera erlendis þegar innrásin á skrifstofur olíufélaganna var gerð. Þetta er náttúrulega bara bull. Og Þórólfur ofurborgarstjóri skammast sín ekkert þó að hann hafi tekið þátt í þessu. Enda sat hann aldrei neina fundi með forstjórunum að sögn. Svo skiptir þessi sekt náttúrlega alls engu máli. Það þarf engin að segja mér að olíufélögin hafi hætt samráði, þeir passa bara að hafa ekkert skriflegt hér eftir. Svo borgum við þeim sektina til baka með bros á vör með hækkandi bensínverði. Aumingja greyin. Erum við ekki heimsk.

|

Heyrði alveg snilldar viðtal í svæðisútvarpinu í dag við einhverja konu í Þistilfirði sem Pétur Citroen tók viðtal við. Þannig var að á bænum Ytra-Álandi birtist allt í einu leðurblaka í fullum skrúða og gerði sig heimakomna við tölvu heimilisfólksins. Fyrst hélt ég reyndar að ég hefði sofið heldur lengi og kominn væri fyrsti apríl vegna þess að ég hef aldrei nokkurntíma heyrt um leðurblökur á Íslandi, hvað þá norður í Þistilfirði. Enda skilst mér að þetta hafi ollið vísindamönnum landsins nokkrum heilabrotum. Það kom að vísu fram að einstaka sinnum hafa flækst hingað blökur með millilandaskipum og var víst ein í Vestmannaeyjum fyrir nokkrum árum síðan. Millilandaskip í Þistilfirði, næsta höfn er Þórshöfn og það er ekki gríðarleg traffík af flutningaskipum þar. En svo rann upp fyrir mér ljós. Það var heill floti af rússneskum herskipum sveimandi um fyrir utan Þistilfjörð á dögunum og enginn þóttist vita hvað þeir voru að bardúsa. Hér komin skýring á því. Þeir voru í samvinnu við ríkisstjórn Íslands að koma fyrir njósnavélmennum í líki leðurblaka í heimasveit eins helsta stjórnarandstöðuforkólfsins, hans Steingríms J. Hversvegna veit ég hins vegar ekki en þetta getur bara ekki verið tilviljun. Kæmi mér svo alls ekkert á óvart þó að upp kæmi að Norðmenn hefðu átt einhvern að máli þarna.

Að öðru. EINAR KR. GUÐFINNSSON var jafnleiðinlegur og vitlaus og venjulega í sjónvarpinu á mánudagskvöldið þannig að getur drifið sig heim á Bolungarvík aftur til að reyna að útskýra kvótamálið fyrir Vestfirðingum.

Að enn öðru. Hulda mín. Ég hélt bara að það þyrfti ekki að taka það fram hversu mikill listakokkur þér eruð. Enda hef ég oftsinnis notið góðs af Því. Mér fannst hins vegar fréttnæmt að Brynja gæti eldað annað en hamborgara.

|

Undarlegur dagur. Litla systir narraði mig útá Grenivík í dag. Dreif mig af stað um tvöleytið til að ná þessum líka merkilega knattspriddnuleik á Einingunnar í Manchester og Vopnabúrsins frá Lundúnum. Bara til þess að þurfa að horfa á byssurnar tapa sínum fyrsta leik í Úrvalsdeildinni í ég veit ekki hvað mörg ár. Nú er það ekki svo að mér hafi svo em ekki verið slétt sama um það, þar sem ég held alls ekkert með þeim en ég fann bara svolítið til með greyjunum. Svo strax á eftir kom þessi undarlega formúlukeppni þar sem það bar helst til tíðinda að Bazzarello kláraði keppni á heimavelli. Ég er reyndar ekki búinn að sjá stigaútreikninginn í liðsstjóraleiknum en ég held að einhverjir hafi farið langt með að éta upp þetta 800 stiga forskot sem ég var búinn að ná hina "snillingana". Þá eldaði húsmóðirinn bringukolla af hænu með ofnsteiktum kartöflustrimlum, berserkjasveppum, piparávöxtum og grænpiparsósu og var þetta bara nokkuð gott hjá henni og takk fyrir mig Brynja mín. Það er greinilegt að Gunni hefur kennt þér að elda einhverntíman. Þegar öllu þessu var lokið hófst hápunktur kvöldsins. Bingó á Skjá einum með Villa naglbít. Ég hef nú aldrei vitað annað eins á ævi minni. Þarna sat maður með 36 bingóspjöld fyrir framan sig og missti af öllum tölunum. Ég veit ekki ennþá hvort ég fékk bingó því að þetta gerðist allt svo snöggt. Ætli ég verði ekki að horfa á endursýninguna á mánudaginn til að komast að því. Fór svo heim örvinglaður og dauðuppgefinn á sál og líkama í grenjandi stórhríð svo sá ekki útúr augunum. Fyrir þá sem ekki vita það þá er ég ekki enn búinn að gera við miðstöðina í bílnum og það er hálfasnalegt að keyra í hríð með galopna glugga, rúðusköfuna á fullu og sætahitarann botni. En sem betur fer hætti snjókoman skyndilega í Nollarbekkunni þannig að ég var kominn heim vonum fyrr.

GUÐNI ÁGÚSTSSON, varð fyrir svörum á Alþingi um eignarhald á jörðum og ég bara skildi hann ekki. Mér fannst meira vit í því sem Brad Pitt sagði sem hasshausinn í True Romance þarna um árið. Guðni haltu bara áfram að reykja njólann þinn einhversstaðar þar sem fólk heyrir ekki til þín. Man ekki eftir fleirum í bili sem hafa gert á sig í vikunni þannig að það er best að henda GUÐLAUGI ÞÓR ÞÓRÐARSYNI burt líka. Mér hefur alltaf þótt þú leiðinlegur síðan við vorum samam í MA þarna í gamla daga. Og ég sé enn ekki eftir því að hafa ekki kosið þig sem formann skólafélagsins um árið og sá dagur á örugglega ekki eftir að koma.

PS! Það eiga allir orðið fartölvu nema ég. Meira að sega Mamma gamla.

|

Eins og fólk sér vonandi þá var ég að auka við linkana á síðunni. Á samt eftir að laga þetta heilmikið í viðbót.

Hulda mín ég geri það bara fyrir þig að henda henni ÞORGERÐI KATRÍNU GUNNARSDÓTTUR burt fyrir lögin sem hún er ekki búin að setja ennþá á kennarana. JÓN KRISTJÁNSSON fær einnig að fjúka fyrir að láta sér detta það í hug að hækka skatta á áfengi. Mér er alveg sama þó að hann sé frændi hans Dúdda. Þetta bara er ekki hægt. Ef að einhver heldur að áfengisdrykkja á Íslandi minnki með því að hækka verðið á áfengi þá fer hinn sami villur vegar. Það gæti þó hins vegar verið að sala á áfengi í ríkinu minnkaði. En þetta er kannski hluti af þeirri meinloku ríkisstjórnarinnar að einkavæða þurfi allt. Líka áfengisframleiðsluna sem fer líklega að mestu leyti framvegis fram í bílskúrum og kjöllurum landsmanna. Vei vei Jón.

Ef að einhverjum dettur það virkilega í hug að ég hafi ætlað að fækka fötum fyrir systur mínar þá ætti sá hinn sami að láta athuga kollinn á sér. Ég bjóst hins vegar við því að þarna yrði þvílíkur sægur af kvenfólki að manni myndi líða eins og mink í hænsnakofa. Það var nú ástæðan fyrir því að maður klæddi sig uppá og skóf af sér mestu óværuna. En þegar á hólminn var komið þá reyndust þetta bara vera svik og prettir hjá einmana sjómannsekkjum sem að þorðu ekki að bjóða til sín neinum karlmanni nema bróður sínum sem alltaf er góðmennskan uppmáluð, sérstaklega þegar hann heldur að hann geti grætt eitthvað á því.

Jæja það er best að hætta þessu strax svo að fólk geti komist að með að svara þessum ásökunum.

|

Nei Hulda það er ekkert að gerast, allavega sem þú vilt vita. Hef bara ekki haft tíma til að blogga enda alltaf í heimsókn hjá þér.

Fyrir þá sem ekki vita það nú þegar var ég pantaður sem skemmtiatriði á kvennakvöld heima hjá Huldu á föstudagskvöldið. Þannig að ég tók jólabaðið snemma og fór í hreinan G-streng og mætti galvaskur. Mér til mikilla vonbrigða mættu aðeins systur mínar og fyrrverandi kærasta. The Story of My Life.

Svo segja sumir að það sé kominn vetur en hafið ekki áhyggjur, þetta verður allt farið fyrir Jól. Nema kannski uppi á Kárahnjúkum hjá Pála sem kemst víst ekki út úr húsi þarna uppfrá og situr bara og borar í nefið.

Það hrúgast niður börnin í vinahópnum þessa dagana. Siggi og Ingunn eignuðust strák og Dóri Kristjáns og Sibba eignuðust stelpu. Það fer að bresta á hjá Axel og Lilju. En Hreiðar og Ásbjörg eruð þið búin að eiga?. Maður ruglar þessu öllu saman. Hvað var það eiginlega sem gerðist þarna uppúr áramótum sem ég missti af?

ÖSSUR SKARPHÉÐINSSON, þinn tími er kominn af því að þú heldur með slúbbertunum í Norwich City.

|

Nú er það ljótt maður. FVSA er búið að samþykkja áskorun á félagsmenn að afreiða ekki Sólbak EA. Svo komu Gunni og Brynja í dag og þar sem ég er nú svo mikill stéttarfélagsmaður þá mátti ég hvorki gefa Gunna vott né þurrt. Þessi vitleysa fer nú bara að fara með heilu fjölskyldurnar.

í hinum geðveikt spennandi Survivor Althingi 2004 leik þá verð ég bara að sparka GEIR H. HAARDE fyrir allar þessar arfavitlausu skattalækkanir sem hann er búinn að lofa. Skattarnir mínir lækka um 250 krónur en hans skattar um 25.000.- a.m.k. Halló! halló! er einhver heima þarna suðrí Valhöll eða hvað. Svo heyrði ég í GUNNARI BIRGISSYNI í útvarpinu í gær og ég held að ég verði bara að vísa honum frá líka. Hann skilur bara ekkert í þessari heimtufrekju í kennurum. Aumingja Gunnar. Hann er alþingismaður, bæjarfulltrúi í Kópavogi og forstjóri í eigin verktakafyrirtæki. Þannig að hann fær frí greyið. PÉTUR BLÖNDAL fór á kostum í "Íslandi í dag" í kvöld og skildi bara ekki að hvernig fólk færi að því að reikna skattalækkanrinar út, þær væru svo miklu meiri heldur en stjórnarandstaðan væri búin að reikna út. Og ef að fólki findist það vera á láguum launum þá ætti það bara að skipta um vinnu. Burt með þig Pétur.

Annars hef ég ekkert meira að segja.

|

Við Páli skuppum á Oddvitann á föstudagskvöldið og sáum Dark Harvest fara hamförum. Gulli Falk er náttúrulega ekkert venjulegur gítarleikari. Svo eru þeir með trommara sem hefur áreiðanlega einhverntíma verið greindur ofvirkur og bassaleikara sem lét sér ekki duga minna en sex strenga bassa. Ætli nýja platan þeirra verði ekki platan sem maður kaupir þetta árið. Svo mætti ég galvaskur klukkan tólf til Axels til að hjálpa honum að flytja, það gekk bara ljómandi vel fyrir utan nokkrar dramatískar gloríur hjá Hilmari sem fór á kostum sem aldrei fyrr.

Þá er komið að Survivor leiknum mínum. Þar sem að ég hef hekki bloggað í þrjá daga þá er við hæfi að þrír fái að fjúka í þetta skiptið. Fyrstur fer DAVÍÐ ODDSSON, fyrir að plata Halldór Ásgímsson greyið uppúr skónum. Annar fer HALLDÓR BLÖNDAL fyrir afar ótímabæra ræðu við setningu Alþingis og sá þriðji er STURLA BÖÐVARSSON fyrir óvenjulega sprengigleði.

Sæl að sinni

|

Já, Nonni, ég er að tala um þig. Og Sigurpáll þetta er minn leikur og ég ræð. Og bara svo að þú vitir það þá ætla ég að henda HJÁLMARI ÁRNASYNI heim í dag. Hann er víst liðtækur áhugaljósmyndari og ætti frekar að halda sig á því sviði heldur en dingla aftan í honum Halldóri, sen reyndar var sendur heim í gær. Uppvask í Köben, æi nei, vel boðið en samt ekki. Söngvari í frægri rokkhljómsveit kannski en sjáðu til, ég nenni ekki að vaska upp heima hjá mér svo að ég nenni ekkert frekar vaska upp eftir aðra.

|

Ég er búinn að finna upp nýjan leik sem ég ætla að hafa hérna á síðunni. Mér finnst þetta vel til fundið úr því að "Leikhúsið við Austurvöll" er byrjað á nýjan leik. Leikurinn fer semsagt þannig fram að 63 þátttakendur eru (valdir af handahófi, hehe) með í leiknum, sem sagt allir þingmennirnir okkar. Síðan kýs ég einn og einn í senn burt úr leiknum og sá sem síðastur stendur (situr) eftir vinnur. Í tilefnir stefnuræðu forsætisráðherra hef ég ákveðið að senda fyrst heim á Höfn í Hornafirði, HALLDÓR nokkurn ÁSGRÍMSSON. Hann getur bara drifið sig heim í flökun hjá Skinney-Þinganes til þess að létta undir með útgerðinni sinni, fyrst hann var svona vitlaus að láta Dabba plata sig til að verða forsætisráðherra áður en allt færi í kaldakol í þjóðfélaginu.

|

Ég er nú ekki alveg að fatta þessa vitleysu. Í gærkvöldi skrifaði ég þessar greinar sem eru skráður undir 4. október. Einhvern veginn hurfu þær þegar ég ætlaði að birta þær á blogginu en svo eru þær allt í einu þarna núna og það meira að segja í öfugri röð. Hvað er í gangi eiginlega?. Og hvar er eiginlega myndin af minni fögru ásjónu. Vottthefökkisþiss eiginlega?

|

Jæja, þá er maður nú farinn að mæla einu sinni enn. Alltaf jafn mikið stuð í gangi. Það er svo sem ekkert að frétta héðan frekar en venjulega. Ég gæti þusað heilmikið um framsóknarflokkinn og Kristinn H. og ég gæti þusað um Jón Steinar, hrl. en ég bara nenni því ekki. Ég held að menn séu að verða búnir að segja það sem segja þarf í þeim málum. Ég gæti þusað um kennaraverkfallið en ég læt Huldu systir það alveg eftir þar sem hún fer bráðum að verða ein af þessum heimtufrekjum (hehe, bara að launa þér fyrir smsið í dag).

Annars stökk ég. (Af hverju skrifar maður svona vitleysu, lesist: Ég fór á bílnum) upp á Mongó í hádeginu og horfði á Coventry - Ipswich, sem að mínir menn unnu auðvitað. Varamarkmaður Ipswich byrjar inná í sínum öðrum leik á ferlinum og ver víti, tvítugur strákurinn (Wales U21). Dean Bowditch (England U19) kom svo Ipswich yfir en svo jöfnuðu Coventry og skoruðu svo sjálfsmark í restina. Gaman að sjá mína menn spila 4-3-3 eins og á gullaldarárunum. Með þá þrjá frammi, Bowditch, Darren Bent (England U21) og Shefi Kuqi (Finnland A). Mér fannst nú samt illa mætt af Ipswich mönnum þarna uppfrá þar sem að ég var þarna einn í fyrri hálfleik að vísu varÁrni sjálfur með annað augað á þessu en það bætti töluvert úr skák í seinni hálfleik þegar enginn annar en Sveinbjörn "Sjallaskrímsli" mætti galvaskur og horfði með okkur. Ég vil nú samt taka það skýrt fram að hann heldur með Wolverhampton Wanderers.

Þegar öllu þessu var lokið þá dreif ég mig útá Grenivík í kaffi (og mat) til Mömmu gömlu sem bakaði vöfflur í tilefni dagsins og steikti kótelettur í kvöldmatinn, þannig að maður er bara nokkuð vel haldinn í dag, sei sei.

|

Ég var búinn að skrifa hérna langa grein um þjóðfélagsmál en tölvutu.... týndi henni fyrir mér.

|